Pag aalay Kay Maria Ngayong Mayo

Flores de Mayo o Santacruzan? Photo: Coro de Sta. Ana

Mayo na mga ka-Dambana! Panahon na ng pamumukadkad ng mga bulaklak sa tagsibol at pagdedebosyon sa pinakamagandang bulaklak sa langit, ang Mahal na Birheng María. 

Panahon na rin ng 𝗙𝗟𝗢𝗥𝗘𝗦 𝗗𝗘 𝗠𝗔𝗬𝗢 at 𝗦𝗔𝗡𝗧𝗔𝗖𝗥𝗨𝗭𝗔𝗡. Pareho nga ba sila o magkaiba?

𝗙𝗟𝗢𝗥𝗘𝗦 𝗗𝗘 𝗠𝗔𝗬𝗢

Pagpaparangal sa Mahal na Birhen kung saan araw-araw sa buong buwan ng Mayo, nag-aalay ng bulaklak sa Ina ng Diyos.Sa San Mateo, nakatuhog ang mga bulaklak sa 31 buslo (basket), sumisimbulo sa 31 araw ng Mayo.

𝗦𝗔𝗡𝗧𝗔𝗖𝗥𝗨𝗭𝗔𝗡 

Natatanging debosyong Pilipino kung saan pinararangalan ang Cruz ng ating Panginoon na tumubos sa ating mga kasalanan. Ito ay sinasariwa sa isang natatanging prusisyon kung saan ang mga binata’t dalaga ay kumakatawan sa mga tauhan ng Banal na Kasulatan. Pinakatampok sa mga ito si Emperatriz SANTA ELENA, ina ni Emperador Constantino, bilang pagpupugay sa kanya sa pagkakatagpo sa Mahal na Cruz ng ating Panginoon. 

Kasama rin rito ang mga virtud o magagandang katangian ng Mahal na Birheng María bilang parangal sa Kanya. Ang mga ito ay ipinangalan sa mga reyna tulad ng Reina Fe (Faith), Reina Esperanza (Hope), Reina Caridad (Charity).

𝗠𝗜𝗦𝗔 𝗡𝗚 𝗣𝗔𝗦𝗔𝗦𝗔𝗟𝗔𝗠𝗔𝗧 

Ginaganap tuwing ika-9 ng umaga sa araw kung kailan gaganapin ang Santacruzan (kadalasan ay huling Linggo ng Mayo) bilang pasasalamat sa buong buwan ng debosyon 

Sa San Mateo, ipinuprusisyon ang imahen ng Birhen ng Aránzazu mula sa bahay ng Hermana Mayor ng Misa Pasasalamat kasama ang mga sagala na sasali sa Santacruzan kinagabihan, patungo sa simbahan bago ang Misa.

𝗩𝗔𝗥𝗔 𝗔𝗟𝗧𝗔 𝗡𝗚 𝗛𝗘𝗥𝗠𝗔𝗡𝗔𝗦 𝗠𝗔𝗬𝗢𝗥𝗘𝗦 

Katulad ng Hermano Mayor ng mga kapistahan, makikita natin ang tatlong Hermanas Mayores na may dalang tungkod na tinatawag na VARA ALTA, sumisimbulo sa kanilang katungkulan bilang mga punong tagapagtaguyod ng pagdiriwang. 

Sa rito pagkatapos ng Santacruzan, ipapasa ang mga ito sa mga mga Hermanas Menores na manunungkulan sa susunod na taon.